مغامرات العيد علي الصحراوي

31 Aug

بمناسبة المغامره بتاعت أمبارح اللي حصلتلي مع العرب اللي كانوا قافلين طريق إسكندريه أحب افكركوا بالبوست اللي بحبه مع بعض التغيرات المهمه .كان يوم اسود يوم ما روحت مارينا ……. اهلي حبوا أني اغير جو كالعاده بعيد عن المظاهرات و التفكير…… ولو يوم واحد و اقعد معاهم و نروح مارينا !!!!! و يارتني ما روحت … طبعا دي تاني مره اروح من بعد الثوره اولا طبعا العرب كانوا قفلين الطريق الساعه ١٢ بالليل عند الماستر بالنار بعرض الطريق و ممنوع اي حد يعدي و لو حد فكر يتكلم معاهم يهجموا عليه و يعدوا يخبطوا علي العربيه و عايزين يكسروها و كل ده علشان بنت اتخبطت و ماتت و العربيه جريت … و طلبين ان الجيش يجيلهم و يبنلهم كبري !!!!طبعا كل العربيات اتكربست علي بعض و الناس فكرت تلف و ترجع علي القاهره راحوا قافلين الطريق الراجع كمان … و الناس ابتدت تتنرفز و ناس سلمت للأمر و قعدت في الماستر .. لكن أنا قلت بأه اعمل فيلم و قلتلهم أمي مريضه و لازم اروح بيها علي المستشفي .. ففي واحد من العرب قالي تعالوا ورايا و أنا همشيكوا من ورا الرست القديم .. طبعا اترعبت و قعدنا نفكر شويه بس قلت أنا إيه اللي هيخلينا واقفين بالساعات فقررنا نمشي وراه. … و فعلا بعد ما مشينا وراه دخلنا في مناطق غريبه ورا الرست القديم مرعبه و ناس واقفه بشوم …و يقولوا هيضربوا عليكوا نار … المهم الراجل كل شويه يقولهم تبعي و في الاخر بعد رحلة الرعب دي طلعنا ورا مستشفي جراحات اليوم الواحد و لفينا طلعنا علي الطريق الحمدلله ووصلنا مارينا !!!! و يا ريتني ما جيت مارينا لأني كنت فكره بأه أنها أكيد هتكون فضيه و المحلات مقفله ما هي العجله وقفه .. و الناس مش فايقه لا مارينا و لا عجمي ولا ساحل و لا معاها تصيف اساسا ….. و الصدمه بأه !!! الوضع مختلف تماما .. اولا اعداد مهوله من البشر و لا كأن حاجه بتحصل في البلد و لا كأن في اعتصامات و مظاهرات و احتجاجات و استعدادات للانتخابات و المحلات كلها فتحه و العجله بتجري مش بتمشي … و الناس زي الفل و تمام و فلوسهم معاهم و سهر و خروجات و مش متأثرين بأي ثوره اساسا ولا كأن في ناس ماتت بس علي رأيهم الله يرحمهم …….. و يسلام لو كلمت حد في الثوره و لا قولتلهم أن في ناس لسه بتتظاهر … تتشل طبعا من الإجابات …….. اول أجابه إيه ده هي مش الثوره خلصت و مبارك مشي و اتحاكم امام عنيكم !!!!! تاني أجابه إيه ده هو في حد فعلا لسه بيتظاهر.. طيب ليه؟ !!!!!! الاجابه التالته .. انتوا عايزين إيه تاني بأه ارحمونا ما البلد ماشيه آهه و المجلس بيعمل كل اللي إحنا عايزينه..!! الاجابة الرابعه .. لا بأه دا أنتو مش هتسكتوا غير لما تخربوا البلد …..!!!! و الاجابه الخامسه أكيد معروفه و هي فين أيامك يا مبارك !!! و أنا اسمع الكلام ده و ألطوم …. و كل الإجابات دي طبعا من ناس مختلفه و اعتبروني طبعا أنا من فلول التحرير و بلطجيه و جايه مارينا اعمل انقلاب!!! و محدش يقولي أني اللي كلمتهم ولا شفتهم في مارينا من الاغلبيه الصامته و لا حزب كنبه لان دول علي الاقل ممكن يكونوا مع او ضد لكن الناس اللي أنا قبلتهم و شفتهم للأسف دول في الغيبوبه!!و علشان محدش يزعل ممكن يكون فيهم ١٠٪ اغلبيه صامته لأني طبعا ما كلمتش مارينا كلها !!فكرت مع نفسي قلت يا سبحان الله يعني الناس اللي عندها امكانيات و أكيد عندها توعيه من تلفزيونات او جرايد … عملين نفسهم مش واخدين بالهم و بايعين القضيه،،،، أومال بأه حال الغلابه اللي في القري و العشوئيات يعملوا إيه و بيوصلهم إيه ؟؟؟ أكيد تضليل و زياده في الغيبوبه !!!! و بالمناسبه أنا مش ضد ان اي حد يروح يصيفلوا يومين بس علي الاقل يكون مؤمن بالثوره و انها لسه مستمره و ما نجحتش ….. و انه يساعد و لو بكلمه !! لكن حياة الغيبوبه دي واللي عامل مش واخد باله متنفعش …….. حس بغيرك ، ساعد غيرك هيجيلك اليوم اللي هتحتاج حد يقف جنبك!!!!!!! ثم إحنا بنتكلم عن مصر .. بلدك مش لازم تكون دلوقتي ليك بس أكيد في يوم هتكون لولادك ….

One Response to “مغامرات العيد علي الصحراوي”

  1. MeRa_AmmAr September 12, 2011 at 10:35 pm #

    ya sb7an allh fe nas msh 3ysha m3ana wla 7asa bel by7sal ….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: