عمرنا ما هنكون بشر!!!

21 Jan

مش عايزه حد يزعل مني بسبب الكلام اللي هقوله بس دي الحقيقه…
احنا بلد متخلفه وهنفضل طول عمرنا كده وعمرنا ما هنتطور ولا نتعدل طول ما فينا ناس معندهاش احساس بالآخر ولا فكر ولا ارتقاء بالأخلاق …

اخدت أبني وهو عنده مشكله بسيطه ورحت كدزينيا اللي هي المفروض مكان محترم وناس كتير شكرت فيه انه حاجه مختلفه للولاد … وهو فعلا مكان كويس ولطيف والولاد انبسطوا بس الوقت هناك قليل و اسعاره غاليه لو معاك اكتر من طفل … بس مش دي المشكله

هما عاملين حاجه لطيفه جداً ان لو حد معاه طفل حاله خاصه special needs بيسمحوا ليه هو ولي امره انهم ما يقفوش في الطبور وبيدخلوه علي طول وبيكون معاه مساعده .. طبعا ماصدقتش نفسي قلت ايه الجمال ده دول بيقلدوا بره .. وفعلا حصل معايا كده ..
وجينا ندخل في مكان فدخلونا علي طول طبعا من غير طابور
جه ولد عنده ١٣ سنه شحط يعني رايح منادي علي باباه وجه الأب بيزعق في البنت اللي بتدخلنا ويشرشح بمعني بيشرشح ويقولها يعني ايه الولد ده يدخل الاول تقوله لوسمحت ممكن ثانيه علي جنب يقولها لا قولي هنا دلوقتي .. تلات اربع مرات البنت تطلب منه انها تفهمه علي جنب علشان هي خايفه علي مشاعري وده أبدا زعيق متواصل انه ايه سبب ان ابني اللي عنده ٦ سنين يدخل الاول فقولتلها فهميه عادي ادام كل البشر اللي واقفين انا مش بيفرق معايا وقالتله حضرتك في قانون ان اي حاله خاصه مش بتقف في طابور .. راح مزعقلها اكتر يقولها انا ميهمنيش حاله خاصه ولا مش خاصه المهم ابني يدخل بلا حاله خاصه بلا بتاع …
وطبعا مش ده بس في كل مره نيجي ندخل يحصل الموقف بطريقه مختلفه تلميز ونظرات وأفأفه … فعلا ناس تجبلك حالة احباط .. والمفروض ده المستوي التفكيري للناس اللي معاها فلوس

وانا وقفه بسمع المهزله وقلة الأدب والتخلف والراجعيه وعدم الإحساس من البشر اللي زي دي ..
فبقول ان فعلا عمرنا ما هنكون بني أدمين طول ما في أشكال زي دي في البلد و هما فعلا كتير …

لا حول ولا قوة الا بالله

آه بحب أمريكا

15 Jan

طبعا كله دلوقتي قبل حتي ما يقرا …. هيقول عليا .. ااااه يا عميلة الأمريكان …
طيب استنوا شويه وأقروا وبعدين قول رأيك .. طبعا كله عارف ان مصر فيها ما يعادل من ١٥ مليون ذوي احتياجات خاصه فيهم ما يقرب من ٤ مليون صم وبكم ،.
وطبعا في الدستورالجديد العظيم فيه كل ما يحمي ويعطي حقوق لهؤلاء الاشخاص ( كده وكده يعني )
وريسنا العظيم المؤمن مرسي قرر يرعاهم و يدلهم حقوق كتيره

المهم للي يعرفني أوما يعرفنيش . قررت أخيرا احكيلكوا علي جزء من قصه مهمه جداً ليا ..
هو الموضوع ملوش دعوه بالسياسة ولكن له دعوه بحال كتير منا وحال البلد !!

هحكيلكوا القصه من الاول مختصره بس مش اوي اوي يعني …وناقصه تفاصيل كتيره…من ٥ سنين رزقت بأبني الصغنن البطل…
وبالصدفه كنت في امريكا و اضطررت أني اولده في الشهر الثامن من الحمل ..
المهم بعد ولادته هناك وانا في المستشفي .. جالي الدكتور وقالي للأسف ابنك عنده مشاكل كتير منها شلل بالعصب السابع في الجهة اليمني من الوجه .. غير انه عنده ودن اصغر من التانيه وضعف سمع شديد…. وقالولي انه ممكن مايسمعش تاني .. طبعا نزل الخبر عليا كالصاعقه مش علشان اللي طلع عنده ولكن لاني كنت راجعه مصر ومش عارفه مصيره هيكون ايه في مصر… بس شويه وقلت الحمدلله و دي إرادة ربنا ..
المهم أني رجعت مصر وابتديت اعرضه علي اكبر دكاتره في مصر … اولا في السمعيات وإذ بي افاجأ انهم بيقولولي انه بيسمع !!!!!!
وانا بأه بثقتي في الدكاترة العباقره اللي عندهم ضمير في مصر صدقتهم … غير انهم بالكشف علي الشلل اللي في وشه .. قالوا مش هنعرف نعمله حاجه !!!! لأنهم اصلا مش فاهمين ايه ده ولا ايه حل المشكله!!
المهم فرحت ومشيت علي كلام ان الولد بيسمع … مرت ٣ سنين والولد مش بيتكلم ومش بيفهم كلامنا !! عرضته تاني علي دكتور تاني ورد عليا بعد الفحوصات وقالي بيسمع !!! قلت يمكن الولد عنده مشكله في المخ وما بيستقبلش الكلام ،، وكنت هدخل في طريق تاني خالص !!!
وشوف بأه المصيبة … أخدت فحوصات السمع و دخلت علي النت و قعدت أدور علي الأرقام اللي طلعت في تقرير السمع … بصيت لقيت ان الأرقام اللي طلعه دي تساوي ان الولد عنده ضعف سمع شديد !!!!!!
يعني الدكتور يأما حمار ومش فاهم يأما معندوش ضمير … طبعا أتجننت..

ابتديت اراسل دكاتره في امريكا و فعلا سافرت والولد عنده ٣ سنين و هناك بعد الكشوفات والفحوصات طلع فعلا عنده ضعف سمع وكان لازم يلبس سماعات من عمر ٦ شهور علشان يبقي زي الاطفال الطبيعين وعملتله سماعات بحوالي ٣٠ الف جنيه.. وشكرا للدكاتره الأفاضل اللي ضيعوا علي ابني سنتين ونص من انه يسمع ….

لسه لسه هو أنتو شوفتو حاجه!!!
أخدت الولد ورجعت تاني علي مصر .. وسيبكوا بأه من كم المصاريف في السفر والاقامه وكشف الدكاتره وتمن السماعات اللي دفعت فيها دم قلبي …
قبل ما اكتشف ان الولد عنده تأمين علشان معاه باسبور وانه ليه تأمين خاص علشان عنده اعاقه مولود بيها !!

قلت بأه الولد لازم يأخذ تخاطب علشان الحق ادخلوا مدرسه زي الاطفال اللي في سنه ..
طبعا لفيت علي كم من دكاترة التخاطب .. ويسلام علي إلهنا اللي انا شفته .. طبعا بالحجز و مواعيد متباعده وأسعار لا تقل عن ٧٥ جنيه للجلسه اللي هي ٢٠ دقيقه .. طبعا علي ما الولد اصلا يدخل تكون الجلسة خلصت … وممنوع ان الام تدخل ..
طيب يا سيادة الدكتور او الدكتوره أتعامل مع ابني ازاي او أراجع معاه ازاي !!!!! ملهمش دعوه المهم المتاجره ولهف المعلوم ….
طبعا بعد سنه من هم التخاطب الغير مفيد و دفع دم قلبي .. ابني الحمدلله بأه يقول كده يجي كلمتين تلاته كده!!!
وابني تم اربع سنين وكان لازم ادخله مدرسه … شوف بأه ياسيدي المهزله ..
الف وادور علي جميع مدارسك يا مصر الاينترناشونال واللغات انهم يقبلوا ياخدوا الولد .. يقولك معندناش إمكانيات لضعاف السمع … قال ايه وانا سمعت عن قانون كده يقولك الدمج في المدارس!!!!!
وغلبت اشرحلهم ان ابني طبيعي بس هو مجرد عنده ضعف سمع مش أصم ومفيش فايده !!!!

يعني الولد رغم انه عند أهله إمكانيات لتعليمه لكن مش عارفين نعمله حاجه شوف الجبروت!!!
المهم كل شويه ادخل علي النت واشوف ايه الحل لمشكلة السمع لابني لان سمعه كان بيقل كل فتره.. بصيت لقيت ان في عملية زرع قوقعه …
روحت لدكتور ومن غير كشف كده وبالفهلوه قالي ده محتاج زرع قوقعه .. طيب حضرتك وبكام دي قالي ١٦٠الف جنيه للودن الواحده … قلت يانهار اسود !! بس ماشي هتصرف ..المهم ابني يسمع
طبعا كان محتاج إشاعات ورنين .. بعد لما طلعت النتايج اكتشفنا انه عنده مشكله في القوقعه والعمليه صعبه ومن الصعب تتعمل في مصر!!
المهم الدكتور اللي هنا في مصر صمم علي رأيه و قالي عادي عادي بتتعمل!!!
طبعا بعد خبره مع دكاترة مصر العظماء رحت واخده الولد ومسافره بيه امريكا تاني وطبعا كنت عملتله التأمين بتاعه… شافوا التقارير و عادوا كل الإشاعات والرنين تاني … وبعدين قالولي الولد ما ينفعش يعمل العمليه دلوقتي لانه لسه عنده جزء بيسمع بيه وحرام نضيع السمع الطبيعي حتي لو نسبته بسيطه !!!!
طبعا ابتديت اتعب وازهق ونفسيتي باظت ابني في مصر عملين يلعبوا بيه الكره …. لا مدرسه راضيه تقبله ولا دكاتره عندهم ضمير ولا ليه اي تأمين يسنده….!!!
وقالولي ان الولد لازم يبتدي يعمل عمليات وشه دلوقتي لانه تم خمس سنين وده سن العمليه وكمان عملية تجميل ودنه …!! وسألتهم الكلام يأخذ وقت إد ايه قالولي محتاج حوالي ٦ عمليات هتاخد سنتين… شامل التأهيل اعمل ايه انا بأه ؟؟؟؟

عايزه بس قبل ما اكمل احكيلكوا علي مصاريف العلاج والكشوفات بعد لما عملتله التأمين بتاعه…
اولا تمن الكشف الواحد يساوي ٥٠٠ دولار و الاشاعه الواحده حوالي ١٥٠٠ دولار .. طبعا هو عمل إشاعات كتير و كشوفات كتيييير .. عايزاكو تحسبه بأه قبل التأمين دفعت إد ايه وبعد التأمين هما اتكلفوا كام.. ولو مكانش الولد عنده تأمين كنت هدفع كام!!!

المهم جيه الوقت اللي لازم أخد القرار فيه افضل بأبني اعالجه في امريكا ولا ارجع بلدي اللي بحبها وما عملتليش اي حاجه وأحاول فيها ؟؟ طيب أجيب مصاريف ابني دي كلها منين !!! و اعمله عملياته دي كلها فين؟؟

المهم أني أخدت القرار وفعلا قعدت في امريكا لان ابني اهم من نفسي وهو المستقبل و اجرت بيت بصعوبه بعد مساعدة اصدقاء لاني معنديش اقامه مجرد فيزا .. وابتديت مشوار العمليات .و ماادراكوا ما كنت اعانيه من خوف وقلق وتعب نفسي .. عمل ٣ عمليات في منتهي الصعوبة منهم عمليه لمدة ٧ ساعات فيها ٥ فتحات في جسمه … أخذوا ضلع علشان يزرعوه في ودنه و عصب من رجله علشان يزرعوه في وشه وتفاصيل تانيه كتيره .. و لسه ابني عنده مراحل تانيه كتير من العمليات وربنا يكون في عونه ويشفيه…

المسخره التانيه بأه … انهم قالولي انه لازم يدخل المدرسه … قلتلهم طيب يدخل فين !! لاني طبعا حاولت في مصر وكان مستحيل لكن للأسف هناك القصه مختلفه…
طلع ان من حقه ان بدخل اي مدرسه وببلاش ويتعامل معامله خاصه مع وجود ممرضه ومترجم خاص ليه اذا كانت مدرسه عاديه … وفي خلال دراسته بيتابعوا ويشوفوا لو محتاج يدخل مدرسه خاصه لضعاف السمع هما بيوجهوا ويسهلوله كل الإجراءات والمواصلات اذا كانت المدرسه بعيده.. غير أني من حقي اعترض لو مش عجبني قراراتهم وممكن ارفع عليهم قضيه والمحامي كمان هما يدفعولوا مش انا !!!!!
ايه رأيكم لحد كده !!! خلي بالكو انا ام وبتدور علي مصلحة ابنها حتي لو في المريخ … !!

وللمعلومه في المدرسه هناك اتعملوا اختبار ذكاء وطلع ابني النتيجة بتاعته اعلي من اي طفل بيسمع في سنه بكتير … شوفتوا إلهنا ان البهوات اللي في مصر مرضيوش يدخلوه المدرسه!!

عايزه بس اقولكوا أني اكيد حاولت مع الحكومه المصريه العظيمه بصفتي ام مصريه وابني يحمل الجنسيتين علشان طبعا افضل في مصر وما اتبهدلش وأبعد عن بلدي واربي ابني بره مصر.. ولكن للأسف أخدت كل خير!!!
بص بأه اللي حصل …قبل طبعا ما أسافر والد ابني طبيب معروف وحاول بمعارفه انه يوصل لرئيس الحكومه وفعلا وصل لمكتبه وقالهم انه محتاج يعالج ابنه علي حساب الدوله لان ده من حقه وعلاجه تكاليفه كبيره .
هههههه قالوله طبعا طبعا هنحاول بس هات كل تقاريره …. وفعلا ودلهم التقارير … وبعدين بأه المتوقع حصل .. التهرب …و فوت علينا بكره وهنكلمك في التليفون وكده…
وانا قلت في نفسي يعني اشمعني انا ابني اللي هيتعالج علي حساب الدوله هو كان ابن بارم ديله… ده حتة عيل مصري عنده ٥ سنين زي كتيررررر غيره يفضل كده زيه زي غيره يعاني من اعاقاته!!!!!

نرجع بأه للمفيد والمهم … عايزه اقولكوا علي كام نقطه مهمه وكام درس مهم من القصه دي …

-اولا ان ربنا لما بيبتلي البني ادم بابتلاء بيكون باعت الحل معاها الاول …
وده دليل أني ولدت ابني بالصدفه في امريكا وطلع عنده كل المشاكل دي علشان يرجع يتعالج هناك !!!! لان ربنا عالم ان علاجه مش موجود في مصر واني مش هقدر اتكلف كل التكاليف دي..

-ثانيا : تقبل البلاء و الرضا والتوكل علي الله وكثرة الصلاه والصدقات لو مقتدر
والدعاء بلا تعجل في الاجابه والصبر الصبر الصبر لان والله كل ما تصبر علي الابتلاء وبالذات في ابنك وكل ما يشتدد كل ما ربنا بيزيدك إيمان ويفتح في وشك السكك والحلول
وشوف بأه كم الحسنات و مكانك انت وابنك في الآخرة

- ثالثا انا مش بشكر في امريكا كسياسه وعارفه كويس انها فيها سلبيات تانيه كتير و مصالح شخصيه وعندهم روتين زينا والتأمين بياخد وقت بس في الاخر بتاخد حقك و لكن انا دلوقتي بعمل مقارنه في اللي ممكن دوله متقدمه تقدمه لشعبها ودوله كل همها الجري ورا السلطه ومص دم الشعب وإهمال الفقراء والمرضي وذوي الاحتياجات الخاصه
وكل واحد يجي يمسك البلد كل همه أن يلهف ويجري..
-رابعا بفكركوا ان فعلا في ناس كتير محتاجين مساعده لأنهم معندهمش الفرصه ولا القدره ولا المال انهم يقفوا ولا يعالجوا أولادهم … لاني مريت بالمشاكل دي وعارفه إد ايه مكلفه جداً جداً ماليا ونفسيا و رغم أني نوعا ما مقتدره اني اجيب تذكرة طيران او اءجر شقه او اتحمل تكاليف سفر وشوية علاجات وعندي مساعدات اخري و ابني اتولد امريكاني كان زماني مش عرفه اعالج ابني .
وبشحت من طوب الارض
والله يا جماعه البلد دي لازم تتغير و الناس دي محتاجه مساعده نفسيه وماديه ودكاتره عندها ضمير وتأمين وخدمات عامه وتأهيل نفسي وتوعيه شعبيه بقبول الاخر علشان يقدروا يعيشوا ويندمجوا في المجتمع … .. تعالوا شوفوا هناك بيعاملوا ابني ازاي كأنه في مرتبه اعلي منهم وطلباته كلها تنفذ وله حقوق اكثر من اي شخص طبيعي هناك ..

وأخيرا والله انا حكتلكوا بس فتافيت من الموضوع لاني لو حكتلكوا التفاصيل واللي انا فعلا عانيت منه زي كم الدكاتره اللي روحتلهم والبهدله في السفر اكتر من ٢٠ مره في خلال ٥ سنين والمصاريف وبيتي في مصر اللي اتهجر والبعد عن اهلي والتعب الفكري وان ابني مش عارفه مصيره ايه وتقارير طبيه خاطئه واللي ابني حصله اثناء العمليات وان طفل في سنه يتحمل كل الضغوط دي وعمليات ونظرات مجتمع وتجاهل ممكن يجلكوا حاله نفسيه وتقولوا انا السبب …

عارفين مصر وأمريكا دلوقتي بيحسسوني بأيه؟؟وبالنسبالي ايه؟
لما يكون في راجل بيحب واحده أوي أوي اللي هي مصر … وهي بتعامله وحش أوي أوي ومش راضيه تعمله اي حاجه … وتيجي واحده تانيه ري امريكا تعمله كل اللي نفسه فيه وطبطب عليه وتعرفه انها بتحبه أوي فيبأه حيران يفضل مع اللي بيحبها ومش قادر يستغني عنها رغم معاملتها ولا يروح للي هو مش بيحبها بس هي بتحبه وبتعلمه كل اللي نفسه فيه ؟؟؟

رود انت بأه يا حسين….

20130403-185033.jpg

لازم نتعلم نقول الحمدلله

4 Jan

عمرك فكرت وانت داخل تنام و بترفع البطنيه وتنزل تدفه تحتها ان في غيرك مش لاقي حتي السرير اللي ينام عليه !!! يسلام بأه لو عندك تكيف ولا دفايه وقاعد تتفرج علي التلفزيون وتتعشي في الدفي و غيرك قاعد متكتك من البرد و عندهم أطفال مش عرفين يبعدوهم عن البرد واللي نايمين علي الرصيف ولا اللي بيتهم من مجرد صفيح وعايشين في العشوائيات … هل فكرت للحظه وقولت الحمدلله …

طيب وانت كده قاعد في الدفي وقاعد تفكر تأكل إيه ولا إيه .. تأكل من التلاجه ولا تطلب دليفري … ومن كتر حيرتك مانتش عارف تاكل إيه بس المهم في الاخر بتاكل وتنام وانت شبعان …. طيب فكرت وقتها ان في غيرك مش لاقي لقمة العيش وواقف في طابور العيش من خمسه الفجر علشان يطلع بأربع او خمس ارغفه علشان اسره مكونه من سته افراد … وفي الاخر ممكن ما يطلش رغيف واحد ويرجع بيته ولاولاده ايده فاضيه ويناموا وبطنهم برضو فاضيه .. ياااااه ده إحنا بنتكلم علي العيش مش علي الاكل .. هل فكرت في غيرك وانت بتاكل وقلت الحمدلله؟؟؟؟

يسلام وانت نازل الشغل ولا رايح علي الجامعه علي الصبح والجو تلج وتنزل بسرعه وتلاقي عربيتك تحت البيت تركب بسرعه وتشغل التكيف السخن وتلحق معاد جامعتك او شغلك وغيرك نازل قبل معاده بساعتين علشان يلاقي موصلات في التلج او في الحر ويمكن يكون غيره معهوش حتي فلوس للموصلات ويخدها مشي لما رجله تقف …. طيب فكرت في غيرك وقلت الحمدلله. ؟؟؟؟

الجو فعلا برد اليومين دول … طبعا راجع من الشغل او الجامعه ونفسك تستحمي…إيه المشكله عادي جدا هتدخل الحمام وتشغل المياه السخنه وتستحمي وانت مستمتع …أكيد وانت تحت المياه السخنه مافكرتش ان في غيرك اساسا ماعندوش مياه وبيقف بالطابور علشان يجيب مياه يشربها مش يستحمي بيها …. وحتي لو في ناس عندها المياه في غيرها مش لاقيه الغاز او الكهربا اللي تسخن بيهم المياه اللي عندها …..عمرك قلك وقتها الحمدلله ؟؟؟

الصيف ده يا تري هتصيف فين؟؟ طالع الساحل ولا علي امريكا او اوروبا !! طبعا لازم تصيف وتغير جو أكيد مش هتقضيها في القاهره … ولو حتي قعدت أكيد هتخرج كل اسبوع علي الاقل …. طيب فكرت في العائلات اللي مش لاقيين حتي يخرجوا مره في الشهر ولا يخرجوا ولادهم ؟؟ ولا الشباب والأطفال اللي ميعرفوش يعني إيه بحر !! طيب ونبي قول الحمدلله…..

إيه ده هو انت ممكن تدخل المطبخ وتفتح البتاجاز و تعمل اكل وتاكل كده بمنتهي السهوله؟؟ هتقولي إيه المشكله يعني !!! هقولك عمرك نزلت وقفت في طابور الأنابيب بالساعات واتضربت وطلعت في الاخر من غير انبوبه؟؟؟؟ ولا كنت عامل حسابك علي سعر الانبوبه وطلعت بسعر أغلي بكتير!!
اهو معظم الشعب بيعاني من الازمه دي .. ده لو اصلا كان لاقي فلوس الانبوبه…
أكيد انت عارف المأساه دي مش جديده عليك بس بفكرك تقول الحمدلله

شوفت الفرح اللي أتكلف ١٠٠ الف جنيه ؟؟؟ ياااه أكيد حضرت افراح كتير و هتعمل فرح كمان وعندك شقه ومتجهزه …. يا سبحان الله شفت الموظف اللي عنده ٣ اولاد ومش عارف حتي يجبلهم ربع شقه ولا عارف هيجوزهم فين !!!! متقول الحمد لله

انت بتشتغل إيه ؟؟؟؟ مش مهم .. المهم انك بتشتغل …. بتقبض مرتب اخر الشهر ؟؟؟
أكيد .. طيب قول الحمدلله

انت مريض ؟؟؟ معاك فلوس ؟؟؟ يعني بتتعالج ….انت بتسمع وبتشوف ؟؟؟ أكيد …. قول الحمدلله ..
انت عارف ان في كتير غيرك ربنا أخد منهم نعمة السمع او البصر ؟؟؟ بس مش هي دي المشكله … المشكله ان البلد مش بتوفر لذوي الاحتياجات الخاصه اي رعايه معنويه او ماديه وفي منهم معهمش اصلا علشان يقدروا يتعالجوا او يتعلموا ….
ياريت تقول الحمدلله

طبعا أنا لو قعدت اكتب من النهارده لبكره مش هخلص كم المشاكل اللي عندنا و ان فينا اللي عنده حاجات كتير و عمره ما فكر في غيره ولا قال الحمدلله …. ربنا لي حكم في خلقه طبعا … بس برضوا عايزه اقول ان فساد نظام البلد لسنين طويله ادي للي معظم الشعب فيه ومن الفروقات الطبقيه الرهيبه اللي إحنا عايشنها دي ….. ويارب افرجها علي الكل …. والحمدلله !!

شهادة المشير كامله

25 Sep

شهادة المشير

س١ : حصل اجتماع يوم ٢٢ يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج١ : الاجتماع كان برئاسة رئيس الوزراء واعتقد أنه بلغ

س٢ : بداية من أحداث ٢٥ يناير وحتي ١١ فبراير هل تم اجتماع بينك وبين الرئيس السابق حسني مبارك

ج٢ : ليست اجتماعات مباشرة ولكن يوم ٢٨ يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس

س٣ : ما الذي أبداه رئيس الجمهورية في هذه اللقاءات ؟

ج٣ : اللقاءات بيننا كانت تتم لمعرفة موقف القوات المسلحة خاصة يوم ٢٨ وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة
القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة -
أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س٤ : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ هل استعملت قوات الشرطة القوة ضد المتظاهرين بما فيها استخدام الاسلحة الخرطوش والنارية من ٢٥ يناير حتي ٢٨ يناير ؟

ج٤ : ليس لدي معلومات عن هذا واعتقد ان هذا لم يحدث

س٥ : هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج٥ : ليس لدي معلومات

س٦: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج٦ : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س٧ : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج ٧ : ليس لدي معلومات

س٨ : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج٨ : إنا معنديش معلومات بكده.. الاحتمالات كتير لكن مفيش معلومة عندي

س٩ : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج٩: إنا معرفش ايه اللي حصل

س١٠ : هل تستطيع سيادتك تحديد هل كانت هناك عناصر أخري تدخلت ؟

ج١٠ : هيا معلومات غير مؤكدة بس اعتقد ان هناك عناصر تدخلت

س١١ : وما هي تلك العناصر ؟

ج١١ : ممكن تكون عناصر خارجة عن القانون

س١٢ : هل ورد لمعلومات سيادتك ان هناك عناصر اجنبية قد تدخلت ؟

ج١٢ : ليس لدي معلومات مؤكدة ولكن ده احتمال موجود

س١٣ : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج١٣ : رئيس الجمهورية ممكن يكون أصدر أوامر – طبعا من حقه ولكن كل شئ له تقييده المسبق وكل واحد عارف مهامه

س١٤ : ولمن يصدر رئيس الجمهورية علي وجه العموم هذه الأوامر ؟

ج ١٤ : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س١٥ : وهل يجب قطعا علي من تلقي أمر تنفيذه مهما كانت العواقب ؟

ج١٥ : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س١٦: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

ج١٦: إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س١٧: وهل تعلم ان رئيس الجمهورية السابق كان علي علم من مصادره بقتل المتظاهرين ؟

ج١٧: يسأل في ذلك مساعديه الذين ابلغوه هل هو علي علم أم لا

س١٨: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج١٨ : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س١٩: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج١٩ : هذه مسئولية جهات التحقيق

س٢٠: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية

ج٢٠: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفض واتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه ولكن التظاهر وفضه هي خطة وتدريب موجود في وزارة الداخلية

س٢١ : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظوره وذلك من منظور ما وصل لعلم سيادتك ؟

ج٢١ : معنديش علم بذلك

س٢٢ : علي فرض إذا ما وصلك تداعيات التظاهرات يوم ٢٨ يناير إلي استخدام قوات الشرطة آليات مثل اطلاق مقذوفات نارية أو استخدام سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

ج ٢٢ : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س٢٣ : هل يصدق القول تحديداً وبما لا يدع مجالاً
للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج٢٣ : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س٢٤ : هل هناك اصابات أو وفيات لضباط الجيش ؟

ج٢٤ : نعم هناك شهداء

س٢٥ : هل تعاون وزير الداخلية مع القوات المسلحة لتأمين المظاهرات ؟

ج٢٥ : لأ

س٢٦ : هل أبلغت بفقد ذخائر خاصة بالقوات المسلحة؟

ج٢٦ : مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س٢٧ : هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج٢٧ : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س٢٨: هل تم القبض على عناصر أجنبية في ميدان التحرير وتم إحالتهم للنيابة العسكرية ؟

ج٢٨: لا ..لم يتم القاء القبض على أى أحد

س٢٩: فى الاجتماع الذي تم يوم ٢٠ يناير هل تم اتخاذ قرار بقطع الاتصالات؟

ج٢٩ : لم يحدث

س٣٠: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج٣٠: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

و بهذه الشهاده نستنتج ان ثورة ٢٥ يناير ما هي الا خدعه كما قال العالم الكبير عمرو مصطفي و ما القناصه والشهداء و السيارات القاتله الا فوتو شوب و حسبي الله و نعم والوكيل

تساؤلات بسيطه للمجلس

11 Sep

لن انسي هذه الجمله الشهيره الجيش و الشعب يد واحده ….ولكني غيرت رأي مؤقتا و يمكن ان أتذكرها يوما ما!!!! و لكن هناك نقطه توضيحيه أني لست ضد جيشنا و لكني ضد قيادته … لان جيش مصر فيه من الشرفاء كثيرا و لكنهم محاطين بمن هم لا يريدون الا مصلحتهم!!
وهذه الجمله مسحتها مؤقتا من قاموسي عندما استدركت ان طنطاوي و المجلس لهم مصلحه واحده مع مبارك عندما كان في الحكم و بعده كمان !! فأنا مختلفه مع طنطاوي و المجلس منذ يوم موقعة الجمل الشهيره !!
لماذا وقف الجيش محايدا وهو يرى ناس عزل تموت أمامه ؟؟ هل كان من الصعب ان يصدر امر بوقف هذه المهذله ؟ هل كان من الصعب ان يرسل له تعزيزات لوقف المعركه التى استمرت يوم كامل تقريبا ….!!!!!!
هل لانه كان يعلم جيدا من هم هؤلاء البلطجيه المعتدين علي المعتصمين و لم يرد ان يوقف هذه المهذله؟
و بعد حدوث هذه المهزله و انتهاءها …. و لازال المهازل تنهال علينا!!!
فلماذا يحاكم ١٢٠٠٠ مدني امام محاكم عسكريه ؟
و يحاكم مبارك و نظامه البائد امام محاكم مدنيه؟ لماذا قاموا بإحداث اشاعات و تعدي و ضرب و موت مصري بدم بارد يوم موقعة العباسيه ؟؟؟
لماذا لم يتخذوا اي اجراءت حينها ؟؟
لماذا يقتل جنودنا بداخل حدودنا و لا يهتز لهم شعره بل كافأوا اسرائيل ببناء حاجز ضخم امام سفارتها و مكافأة شعب مصر بالاستفزاز العلني ؟؟
لماذا قاموا بعمل خطه واضحه للجميع بأحداث الشغب عند السفاره كي لا يذهب طنطاوي بادلاء بشهادته ؟؟
لماذا أوقفوا علنية المحاكمات التي كانت تعطينا بعض الأمل !! لماذا يحجرون علي آراءنا ؟؟
لماذا يوقفوا عرض بعض القنوات الفضائيه التي يتعرف جزء كبير من الشعب من خلالها علي بعض من الحقائق الواقعه ؟؟؟
هل يعتقدون ان شعب مصر مازال مغيبا كما كان في ال٣٠ سنه السابقه.. هل يعتقدون اننا سنمل ام سنضعف ام سننسي ؟ بالطبع لا فمنذ اندلاع الثوره و انكسار حاجز الخوف .. آفاق المصري لكل خطوه تتخذ من حوله … و لن يصمت علي اي خيانه ممكن ان تحدث لهذه البلد بعد الان !

قال إيه عملنا ثوره !!

3 Sep

سمعت قال إيه ان مصر اتغيرت و لكن بعد ما سمعت بهذه القصه قلت يا ربي هو إحنا عملنا ثوره و لكانت مجرد مسوده وها هي قصة دكتور ذو كفاءه عاليه و خبره و من حملة الماجيستير ضحوا بيه خوفا من افتضاح الامر ..
…كان تشريد الأسر في مصر شئ سهل و خصوصا من الفقراء.. اما الان اصبح تشريد من هم يحملون الدكتوراه و الماجيستر و المهندسين أسهل !!
كانت ستقوم وزارة الصناعه بتشريد ٢٥ اسره و ذلك بسبب الغاء عقودهم من المراكز التكنولوجيه التابعه لها بدون إنذار او حتي إبداء اي اسباب … و هؤلاء المتعاقدين منهم المهندسين و الصيادله و من حملة الماجيستر و الدكتوراه ………….. لمصلحة من ما يحدث ؟؟
فاكتشف انه لمصلحة مقرر هذه المراكز المعين منذ سنه و عن طريق مجلس اداره جميعهم الان في سجن طره و يحاكمون بتهمة إهدار المال العام !!!
و عندما طالبته وزارة الماليه بتخفيض مصاريفه و نظرا لمرتبه الضخم الذي يتعدي ال٧٠ الف شهريا قام بإلغاء عقود ال٢٥ موظف كفؤ و الذين كانوا يعملون علي مشروعات مهمه في تطوير الصناعه في مصر !!!!
و رغم انه كان سيستغني هذا المقرر عن الكفاءات لم يستغني عن سكرتارته التي تقبض ٢٥ الف جنيه في الشهر و هو اكبر دليل علي ان الحال علي ما هو عليه بل الا مبالاه كلمه افضل….
و المصيبه الاكبر ان الصحف كتبت اكثر من مره عن هذا الموضوع ولكن لا حياة لمن تنادي الي ان بعد ما ابتدأ الموضوع في التفاقم قرر ان يلغي عقد عدد قليل حتي لا يكبر الموضوع ….. اريد ان اسأل الي من يلجأ علما بأننا نسمع و نقرأ من حكومتنا الموقره ان لا لإلغاء العقود و لا لتشريد الأسر ….
يف ستسقبل هذه الأسر مصاريف المدارس ؟؟؟ هل سيجدوا الوظيفه البديله في ظروف البلد الحاليه؟؟و لمن يلجأ هؤلاء الكفاءات و لماذا نضحي بهم و لأجل من ؟؟

٩/٩ و ماذا بعد

2 Sep

مصر لها رب حاميها و هكذا ثورتنا العظيمه !!!
بعد عدت احباطات من المجلس و انحياد الثوره عن مسارها الطبيعي … بدأت عجلة الاتزان و رجعت روح الثوره من جديد لنكمل ما بدأناه من ٨ اشهر مضت !
فكما يحدث مثل كل مره ان يجعل الله كيدهم في نحورهم .. حدثت احداث سيناء و قتل ٥ من جنودنا علي الحدود علي ايدي اسرائلين و بدون معرفة الأسباب و كالعاده تعتيم و تضليل !!! و بدل ان تتخذ الحكومه و المجلس خطوات جاده في هذا الموقف .. كانت خطوات مذبذبه و مخيبه للامال بل يكاد لم يؤخذ اي خطوه من الأساس !!!
فقام الشعب كالعاده ليأخذ بحق إخوته المصريين الشهداء و مطالبتهم بطرد السفير الاسرائيلي من مصر و إنزال العلم من علي السفاره الاسرائيليه بالقاهره ..
و بالفعل قامت المظاهرات و بدأت في الزياده يوم بعد يوم امام السفاره و هي سلميه سلميه كالعاده … الي ان وصل العدد لآلاف المتظاهرين رغم اننا في شهر رمضان الكريم و هم يهتفون بإنزال العلم و طرد السفير و لكن بالطبع لا حياة لمن تنادي !
لكن ظهر بطل مصري كعادة المصريين و تسلق العماره المتواجده بها السفاره و انزل العلم .. و ما إدراك كيف كان شعور المصريون و سعادتهم الغامره بتحقيق هذا الهدف و انه حدث من فرد من الشعب …. دون تدخل لأي جهه مسؤله !!
ثم هدأ الوضع من جديد و لا تري اي تحركات من جهه المجلس لإدانة اسرائيل رغم إرادة الشعب في أخذ موقف ضدها .. لماذا ؟؟؟؟ لا ادري هل هي اوامر خارجيه ام خوف ام تواطؤ ام سلامة نيه و خوف علي الوطن !! و لكني لا اعتقد في اخر سبب ذكرته … لأنهم منذ توليهم قيادة مصر في المرحله الانتقاليه لم آري او اسمع لهم موقف ينصف او يرفع او يقدم من شأن مصر …..
و ها هو يوم ٩ /٩ القادم ليس ببعيد .. فقد دعت له كل القوي السياسيه ماعدا الاخوان الذين لم يحددوا موقفهم بعد كالعاده !!!
و ستكون تقريبا بنفس مطالب ٢٥ يناير و التي لم تحقق الي الان بل زاد عليها …. مطالب مثل وقف المحاكمات العسكريه للمدنيين و تحديد معاد محدد للانتخابات البرلمانيه و الرئاسيه القادمه لأنهم الي الان لم يفتحوا باب الترشيح و لم نري اي برامج لاي مرشح رئاسي رغم انهم اعلنوا ان الانتخابات ستجري في نوفمبر القادم …
و السؤال هل ستنجح مظاهرات ٩/٩ ؟ هل سيحقق اي طلب من مطالبها ؟ هل ستتحول الي اعتصام ام ستفض بالقوه ؟ هل ستكون مليونيه ام مثل ما سبقها من مظاهرات ألفيه تبوء بالفشل ؟ اين ستكون هذه المظاهره هل في ميدان التحرير ام سنجدها تجوب كل شوارع مصر ؟ و في النهايه هل ستنجح ام سنستمر علي نفس الوتيره و ستظل مصر و شعبها تحت رحمة المجلس العسكري و تستمر الاعتصامات الي مالا نهايه ؟؟؟؟

Follow

Get every new post delivered to your Inbox.

Join 33,494 other followers